狗狗游水好地方－屯門瑜翠園

好耐冇去過海灘游水，係今日咁炎熱既天氣底下，仲可以同狗狗一齊游，真係可以用一個字去形容“透心涼“！呢度雖然唔係好大，但係岸邊及海水都尚算 ok 乾淨，唔會有好多石仔係灘度吉腳咁，最方便既就係附近竟然有公廁可以俾你游完水去稍微過一過 d 海水，等你同狗狗唔駛鹹鹹濕濕咁走！呢度係屯門瑜翠園前面，近黃金海岸，唔係沙田個愉翠苑呀！

不過要敬告大家，有時會有大量垃圾沖上岸邊令到環境很惡劣，喜歡乾淨既朋友就可能要留意一下。

揸車既朋友，去到瑜翠街尾近迴旋處公廁旁有個避車處都可以泊到幾部車，不過吾知多吾多抄牌！

走過青龍公園，行出小路就到。

今天天氣認真好，仲有人係度釣魚

右邊是幡龍半島及黃金海岸，龍珠島就係相片既正前方，有條橋連接住嗰個地方，不過可能太遠，望吾清楚。

左邊係浪濤灣獨立屋，沿海而建，住係嗰度日日望住個海真係正！

駕車路線：行青山公路，由黃金海岸駛往深井方向，見到有個小欖牌既迴旋處，係第二個出口轉入青龍路，行一陣就左轉入瑜翠街，行到尾左邊係瑜翠園，右手邊就係青龍公園。