逸之燒

池魚王（鰝池魚）

好有魚味，肉質彈牙，鮮甜無比，飛機貨果然吾同，食完想叫多一客話已經售罄囉！

池魚薄切
造型幾靚，普通池魚當然吾及池魚王咁味濃鮮美，但魚質清爽，非常合我同老細口味。

鱆紅魚薄切
估吾到薄切有另一番口味，鱆紅魚味道係有 d 似油甘魚，但冇油甘魚咁多油脂，點少少師傅配既酸汁，又係另一種清爽味道，但佢係比普通池魚味濃兼甜美！

鹽燒牛舌
店員話呢個串燒係佢地名菜，就叫咗一客，果然不錯，肉鮮吾韌，入口即溶，有肉汁，好好味呀！

無啤酒點食串燒呢？

燒茄子及燒飯糰
茄子好像還未燒熟，d 肉仲係連住 d 皮，好難拆開，味道尚可。
從未試過燒飯糰，老細話想試下，食落好似食甜飯焦咁。

七味牛肉大蔥串
蔥香配合灑滿七味粉既牛肉，飲啤酒一流。

鹽燒牛舌實在太好吃，即刻叫多一客，今次好似多咗一舊！

油甘魚（鰤魚）
店員大力推介，話係飛機貨，叫一客試下，嘩，油甘魚肉呈粉紅色，應該係鰤魚黎，但店員一直叫佢做油甘？肉質新鮮嫩口，比起平時食嗰 d 冇咁重油脂，魚味清雅而甘甜濃郁，好味道！

蕃茄豚肉串
食咁多肉，都要食番 d 蔬菜中和一下！

章魚小丸子
個人覺得好普通，但係老細話好食過大板道頓堀嗰 d 喎！

鰤魚實在太好味，同埋吾知幾時有呢 d 咁靚既貨返，即刻 encore  多客，師傅係魚背界一刀，吾知係咪好食 d？！

呢間食店仲有皇帝蟹餐食，如果住元朗呢頭得閒可以黎試下呀，我同老細都覺得有 d 相逄恨晚既感覺呢！

大埔海濱公園

去完鐵路博物館，就順道走埋去海濱公園影多陣就同老細食飯，其實諗住影埋日落，但係最後實在太疲倦同太熱了，影到五點幾就走人嘞。

鐵路博物館

一直都好想去鐵路博物館行下，見今日得閒就拿拿琳攞個相機起程啦，先去大埔綜合大樓熟食中心鴻發食碗牛腩河，然後就行過去博物館嘞。

明星海鮮酒家

先始聲明，這篇不是廣告，只不過覺得幾抵食就同大家分享一下。

星期五，見到明星海鮮酒家今日有特價優惠（其實係咪長期做優惠？），而屋企又搵吾到野食，就同老細去咗呢度試下，七點鬆 d 都吾駛等位。

片皮鴨一隻 $68

我係睇住個師傅用一隻完整既鴨黎片既，即係一碟一隻新鴨，但係原來一隻得咁少，咁淨番個鴨身佢地攞黎做乜架？

清蒸沙巴仔 $88
一食就知不是新鮮的，眼又吾突，肉質仲有 d 咁多梅，但又未至於係雪到死實個種又腥又梅既質地，俾三個 unlike 佢，unlike ～unlike ～unlike 。
不過＄88 條又可以要求 d 乜呢？

芝士焗龍蝦 ＄257
好耐冇食龍蝦，好想好想食，就到魚缸㨂咗一隻，吾知上碟後係咪同一隻呢？
平就吾係好平，如果上湯焗就減＄30，但酒家師傅烹調水準認真好同隻龍蝦夠哂新鮮，搭落芝士味香濃，肉質鮮美彈牙，真係好好食喎。

其實仲叫咗兩隻清蒸大連鮑 ＄14一隻，不過冇影相就食咗。

今次係第一次去呢間酒家食晚飯，招呼服務都吾錯，坐得又舒服，不過野食就普普通通，吾係特價都吾會再黎幫親呢！

鮨亭（屯門青善街）

八月中去咗屯門搵日本野食，估吾到屯門都有間幾高質素既日本壽司店，佢係位於青善街，相隔排隊排到抽哂筋既泰國野一個舖位，呢間泰國野又吾係好好食，都吾知點解會有咁多人排餐懵咁走去食，入便仲要坐到行出行入都吾夠位。

刺身
叫咗活赤貝，帶子，鱆紅魚同埋一條是日限量魚（又吾記得叫乜名），當日只返得兩條，我叫埋就立刻從黑版擦走個魚名，因隔離台已經叫咗一條嘞，師傅張條限量魚整咗兩種食法，好彩早叫，肉質鮮嫩無比，不過想叫多一條都冇。
係元朗屯門區，個人認為，好食程度只係排係元朗壽師之神、鮨文同逸之燒之後，不過鮨亭同頭嗰兩間比又真係冇得比既，價位都吾同，相差大概一倍，邊可以比較呢？但同樣價錢，比起其他元朗區既日本食店例如雞地嗰間大x屋，就真係贏哂啦，如果比起青山公路餅鋪附近大大件三文魚好抵食嗰間就更加贏九條街啦，呢間日本野又係排餐死，有人話青山公路呢間，元朗住開既人係吾會入去食喎，吾係我講架，不過我好耐之前同屋企人去食過一次之後就再冇去過嘞！

蝦天婦羅
蝦天婦羅就差少少，炸漿太厚，蝦係用細隻蝦而且吾係好彈牙。

雜錦壽司
壽司都吾錯好食，仲有最鍾意食既中拖羅，讚！

今個禮拜可能會再去，不過今次就識得主攻魚生了！

地址：屯門青善街22號康景花園地下3-4號舖

炑八韓烤 （九龍城）

八月初，炒蟹就食得多，生蟹就未食過，見炑八有特價優惠卷就去佢度試一試啦。佢而家有成七間分店，我就㨂佢新開既九龍城分店，諗住會容易d卜位掛，點知係杞人憂天既，可能佢個位置差同新開張冇乜人知既關係啦，星期六晚八點幾鐘都未滿座。
見佢都吾係正式韓國人開既店，而係富臨集團旗下既一間特色食店，心諗都吾慌會好食得去邊，點知佢地食材都真係真材實料，肉質新鮮，老細食完讚不絕口，不過佢係食肉怪，乜肉都好似好好食咁，不能以佢作準。

前菜
有海帶、豆芽、酸蘿蔔片、泡菜、生菜（夾肉食用既），食完可以無限免費添加。
我地兩個人有一客沙律，應該不是免費的，如果唔要可以出聲。
爐邊仲有泡菜蛋同芝士粟米，未燒肉前係生既，水汪汪咁，一路燒佢地就會一路熟，都幾得意架。
而食烤肉又點可以冇啤酒呢（不過我其實食乜都要飲啤酒，已經當水飲了），我叫咗杯韓國生啤，嘩，好～淡～口～呀！娜娜淋隊哂佢就另外叫一支韓國啤酒，點知黎咗支熱啤，同經理炸型，佢話d啤酒啱啱擺落雪櫃，好彩最後佢地都攞咗個冰桶黎雪支啤酒，連杯都雪埋都要等好耐先有得飲呀！

醬油蟹
老細係好鍾意食蟹同魚生既人黎，諗住大半隻蟹奉獻俾佢啦，點知佢左睇右睇，遲遲吾肯落手，然後就講咗一句“好怪“，就掂都冇掂隻蟹，跟住仲話開爐燒咗佢黎食，嘩！我緊係娜娜聲隊番隻蟹蚶先啦，燒醬油蟹咁新穎既野都諗得出，老細妳真係我偶像呀！
而家先知道一加一係吾係等如二既，一個咁鍾意食蟹同生野既人，特別係生蠔，原來係會吾鍾意食生蟹既。
我雖然吾係好鍾意食蟹，但係食落又真係好鮮味呀，肉質有少少淋，但淋得黎又有d 嫩，據炑八講，呢 d 蟹係每日係仁川直送到分店，應該係新鮮到無倫，燒咗佢就真係十萬個吾捨得，諗下諗下又隊多一件，結果個蟹蓋同淨番d蟹就俾老細燒咗黎食，真冇陰公！

牛肉雜錦拼盤

有牛肋骨、牛肉眼、上肩胛肉、牛舌、牛胸肉，全無醃製。

牛味濃郁，肉質鬆軟，尤其牛肋骨係成條連骨俾你既，無醃製既肉如果d肉吾靚就好容易食得出，佢地d牛算好質素架嘞！＄4xx 都算合理，兩個人差不多食吾哂。

店鋪

而家已經係七點幾都吾係好多人，店鋪氣氛都算吾錯，裝修餐具與及擺設都幾韓風下，坐得又舒服，我地係被安排坐係卡位度，即係近窗個d，兩個人啱啱好。

已經諗定下次黎食佢個二人韓燒烤肉大餐了，因為想試下燒豬皮呀！

地址：九龍城太子道西408-410號1樓（即富臨酒家樓下）